Промоција на водич со брајово писмо

10 ноември 2016

Идејата за реализација на овој проект постои уште од самите почетоци на работењето на Спомен куќата и беше реализиран со поддршка на Министерството за култура. Водичот ги содржи сите потребни информации за Спомен куќата придружени со текст кој го раскажува животниот пат на Мајка Тереза, од раѓањето се до нејзината канонизација што се случи на 04ти септември 2016 година. Автори на наративниот текст се Андриана Јелиќ и Цветанка Вучковска-Митовска.

Министерката за култура Елизабета Канческа-Милевска изјави дека ова е втор проект на Спомен-домот на Мајка Тереза кој им е наменет на лицата со посебни потреби. Минатата година заеднички беше промовирана и видеопрезентацијата насловена „Тишината раскажува за Мајка Тереза“, преку која на лицата со оштетен слух им се доближија највредните, универзални пораки на Мајка Тереза.

Со овој проект Спомен куќата заокружува едно поглавје и во целост ги задоволува потребите на сите посетители, а на оваа промоција присуствуваа и ученици од Државното училиште за деца и младинци со оштетен вид „Димитар Влахов“-Скопје.